Klaudio Pizarro huazohet te Verderi

Verder Bremen ka arritur një marrëveshje me sulmuesin peruan të Çelsit, Klaudio Pizarro, i cili është transferuar në “Vesershtadion”, me anë të një marrëveshje njëvjeçare huazimi. Sulmuesi 29 vjeçar peruan e priste me padurim transferimin te Çelsi sezonin e kaluar, por nuk ka arritur të kapë një vend në formacionin e parë, duke e nisur vetëm katër herë nga fillimi në Premier Ligë dhe dy herë në Ligën e Kampioneve. “Kemi parë një numër të madh mundësishë, por këtë e presim prej shumë kohësh dhe jemi të kënaqur që transferimi i tij është finalizuar, - tha menaxheri i përgjithshëm i Verderit, Klaus Alofs, skaudra e të cilit do të futet menjëherë në Ligën e Kampioneve. - Klaudio është një nga sulmuesit më të mirë në Europë dhe me të mund të përmirësohemi më shumë”. Trajneri Tomas Shaf shtoi: “E njohim aftësinë e Klaudios prej vitesh. Ai është përmirësuar shumë edhe në vitet e fundit; me anë të lojës së tij ai do ta ketë shumë të lehtë në skuadrën tonë.” Ai është një lojtar që ka luajtur njëherë me Bremenin, ku ka shënuar 29 gola në 56 ndeshje kampionati, nga viti 1999 deri më 2001-shin, përpara se të bashkohej me Bajernin e Mynihut.