Si të vlerësoni një videokamerë dixhitale

Admin Numri i postimeve : 215 Registration date : 10/10/2006

Videokamerat dixhitale gjenden në një shumëllojshmëri formatesh, duke përfshirë këtu kamerat MiniDV, që përdorin minikaseta, modelet DVD, që përdorin minidisqe dhe kamerat me disk të ngurtë, që e ruajnë videon në kujtesën e brendshme. Shumë prej produkteve më të rinj arrijnë të regjistrojnë edhe video me ekran të gjerë (me raport 16:9), të konceptuara posaçërisht për televizorët me definicion të lartë (HDTV). Disa prej tyre të mundësojnë të kapësh imazhe dixhitale të palëvizshëm, pra, me fjalë të tjera, kanë një aparat fotografik dixhital të trupëzuar. Avantazhi kryesor i videokamerave dixhitale është lehtësia e transferimit të videove në kompjuter, me qëllim modifikimi apo ruajtjeje.

Pavarësisht rritjes së numrit të formateve të rinj pa kasetë gjatë viteve të fundit, formati më i famshëm i kamerave dixhitale mbetet ende MiniDV, i cili ofron cilësi të lartë video dhe audio kundrejt një çmimi të arsyeshëm. Ky i fundit është në rënie të vazhdueshme; p.sh. linja MiniDV e Canon fillon nga një çmim rreth 25.000 lekë. Kasetat gjenden lehtësisht në treg dhe nuk keni pse të shqetësoheni në rast se ju mbarojnë gjatë pushimeve. E ardhmja është e orientuar drejt videokamerave pa kaseta, si ato me disk të ngurtë, DVD apo kujtesë të lëvishme, por për momentin MiniDV kryeson klasifikimin.

Kamerat me DVD regjistrojnë direkt në disk dhe në shumicën e rasteve këta disqe mund të shihen menjëherë në një lexues DVD-sh apo në kompjuter. Por, të tillë modele janë më të shtrenjë se ata me minikaseta dhe një DVD bosh zakonisht kushton më shumë se një minikasetë bosh. Avantazhi i formatit me DVD është se DVD-të nuk degradojnë pas leximeve të shpeshta. Përdorimi i DVD-ve të rishkrueshëm (DVD RW) të mundëson ta shkruash 1000 herë të njëjtin disk pa degradim imazhi. Këto lloj kamerash përdorin portën USB 2.0 për t’u lidhur me kompjuterin.

Modelet që po shënojnë një popullaritet në rritje janë kamerat me disk të ngurtë, të cilat e ruajnë videon direkt në një disk të ngurtë të brendshëm. Ana pozitive është se këto janë mjaft kompakte dhe s’është e nevojshme të merren me vete minikaseta apo disqe bosh.

Kamerat dixhitale me kartë kujtese nuk para këshillohen për të apasionuarit pas videove familjare apo në shoqëri. Megjithëse janë tmerrësisht kompakte, ato janë të prirura të prodhojnë video me cilësi të ulët dhe kanë kapacitet të shkurtër regjistrimi.

Nëse keni vendosur të bleni një videokamerë dixhitale, ja 5 veçori te të cilat duhet të bazoheni:

Si të vlerësoni një videokamerë dixhitale Sitevleresosh4

1.Formati

MiniDV është më i liri, DVD është më i thjeshti në përdorim dhe më i lehti për t’u riprodhuar (për t’u parë sërish), disku i ngurtë ofron kapacitet ruajtës gjigand. Secili format ka epërsitë dhe mangësitë e veta, prandaj vini në plan të parë prioritetet tuaja përpara se të përzgjidhni formatin.

2. Stabilizimi i imazhit

Stabilizimi automatik i imazhit e rrit dukshëm cilësinë e videos, duke eleminuar dridhjet që vijnë si pasojë e mbajtjes së kameras në dorë. Ka dy lloj sistemesh për stabilizimin e imazhit: optik dhe dixhital. Stabilizimi optik realizohet me anë të sensorëve, ndërsa ai dixhital bën qendërzimin e imazhit. Stabilizimi dixhital është i prirur të reduktojë rezolucionin e përgjithshëm.

3. Zmadhimi

Kontrolloni shkallën e zmadhimit (zoom) të kameras që keni ndërmend të blini. Ka shumë situata nga jeta e përditshme, ku është e pamundur t’i afrohesh objektivit të fokusuar aq sa dëshiron, ndaj edhe në këto raste vjen në ndihmë zmadhimi.

4. Fotot

Videokamerat që kanë të trupëzuar edhe aparatin fotografik janë shumë të përshtatshme, pasi mjafton të mbartni një pajisje të vetme. Për këto lloj kamerash duhet t’i kushtoni rëndësi jo vetëm rezolucionit, por edhe faktit nëse është i përfshirë fleshi. Gjithashtu, kini parasysh se fotot zakonisht shkrepen me një rezolucion me të ulët se ai i videokamerës.

5.Sensorët

Ka dy lloje sensorësh: CCD dhe CMOS. Të dy kontrollojnë mënyrën se si kapet imazhi nga kamera dhe, pak a shumë, të dy ofrojnë të njëjtën cilësi. Sensorët 3CCD përfshijnë 3 sensorë CCD të veçantë, të cilët kapin përkatësisht ngjyrën e kuqe, të gjelbër dhe blu, duke dhënë si rezultat ngjyra të gjalla dhe imazhe mjaft të detajuar. Sensorët CMOS janë më të mëdhenj se CCD-të, prandaj thithin më shumë dritë. Ata, gjithashtu, përdorin më pak energji, prandaj disa prej modeleve më të fundit përdorin sensorë CMOS.

6.Zëri

Sigurohuni që kamera të ketë portë për mikrofon dhe për kufje, në mënyrë që të keni mundësi të monitoroni cilësinë e zërin dhe të rregulloni problemet e mundshme. Disa prej modeleve të avancuar përmbajnë të ashtuquajturin kontroll manual të zërit (manual audio control), i cili mundëson gradimin e zërit në kanalin e mikrofonit. Kjo është mjaft e rëndësishme, në rast se ju duhet të regjistroni një concert, apo diçka me audio shumë të lartë apo shumë të ulët.