Shpallet data e daljes në treg të GTA IV për PC

GTA IV do të shitet edhe në versioni për PC. Data e daljes në treg në ShBA është 18 nëntori, ndërsa Evropa do duhet të presë deri më datë 21. Themeluesi i Rockstar Games, Sam Houser, tha: “Loja duket mahnitëse në PC dhe mezi po presim që njerëzit të luajnë me të”. Për një version për PC të kësaj loje kanë qarkulluar zëra që përpara lëshimit të versioneve për PS3 dhe Xbox 360, por Rockstar nuk e kishte konfirmuar më parë një gjë të tillë. GTA IV doli më 29 prill dhe në fillim të qershorit Rockstar deklaronte se kishte shitur 8.5 milionë kopje. Në lojë lojtarët vihen në rolin e Niko Beliçit, kur ky mbërrin në Qytetin e Lirisë (një karikaturë e Nju Jorkut) dhe teksa i duhet të përballet me një jetë plot krime për të nxjerrë nga telashet veten dhe kushëririn e tij, Romanin.

Versioni për PC është një goxha hap përpara për Rockstar Games, pasi e bën të disponueshme GTA IV për një audiencë edhe më të madhe. Të gjitha mundësitë janë që të shiten edhe shumë miliona kopje të tjera për ata që s’kanë patur ndërmend të fusin dorën në xhep për të shtënë në dorë një konsolë lojërash si Xbox apo PS3.

Sipas Rockstar, versioni për PC i lojës do të ketë një veçori ekskluzive të lojës në grup dhe s’është çudi që ata që e kanë luajtur në Xbox apo PS3 të blejnë edhe versionin e ri.