Vlera e Apple-it kalon edhe Google-in

Çmimi i aksioneve të Apple-it, i cili është rritur në mënyrë të qendrueshme gjatë viteve të fundit, u mbyll në nivelin 179.30 dollarë më datë 13 gusht, duke e çuar kapitalizimin e tregut të kësaj kompanie në 158.84 miliardë dollarë.

Kjo shifër është më e lartë se ajo e gjigandit të kërkimit, Google, i cili e mbylli po të njëjtën ditë me një vlerë për aksion prej 500.03 dollarësh dhe me një kapitalizim tregu prej 157.23 miliardë dollarësh. Kapitalizimi i tregut është thjesht prodhimi i vlerës së një aksioni me numrin e aksioneve në qarkullim. Ndërsa Google e ka më të lartë çmimin për aksion, numri i aksioneve të saj është shumë më i vogël se ai i Apple-it. (Apple: 885.88 milionë aksione, Google: 314.45 milionë aksione)

Megjithatë të dyja kompanitë janë shumë poshtë në krahasim me super-të-mëdhënjtë si Microsoft dhe IBM, të cilën e mbyllën ditën me një kapitalizim tregu prej përkatësisht 254.83 miliardë dhe 170.44 miliardë dollarësh. Sipas Financial Times, kompania më e madhe në kuadrin e kapitalizimit të tregut është Exxon Mobile, e cila më datë 13 gusht e mbylli ditën me kapitalizimin prej 406.02 miliardë dollarësh.